http://yifertw.blogspot.tw/2016/07/1994.html
Ken Yifertw
多謝啦，有閒做汝來 phoh4 tau7、揬臭 (thuh4 tshau3)，絕對歡迎。
※ 以下的內容，不宜箸我的 blog 回覆，考慮誠久的結果，全文我著在 http://yifertw.blogspot.tw/2016/07/1994.html 留言，當做我與汝的 Email 。毋是啥秘密抑未見眾 (bue7 khiN3 tsing3) 的代誌，只是認為安呢較妥當。算私人信函，汝若欲發表或者刪節PO文，我攏OK。台灣赫宇
多謝啦，有閒做汝來 phoh4 tau7、揬臭 (thuh4 tshau3)，絕對歡迎。
※ 以下的內容，不宜箸我的 blog 回覆，考慮誠久的結果，全文我著在 http://yifertw.blogspot.tw/2016/07/1994.html 留言，當做我與汝的 Email 。毋是啥秘密抑未見眾 (bue7 khiN3 tsing3) 的代誌，只是認為安呢較妥當。算私人信函，汝若欲發表或者刪節PO文，我攏OK。
===============
無想欲佫再PO新兮大概仔是因為：
1. 俗務傷濟、熱誠降溫。
2. tsia5大部分的網志𪜶私底下計有定期咧聚會，嘛會招我去答喙鼓；都合會拄好，普通攏會參加。平常時仔著有咧聯絡，有啥物看法抑觀點，當面辯難、當面溝通。
3. 網志紹介一寡較有歲的新朋友，老先兮𪜶嫌我的發文lo3 lo3 長，無he1時間佮耐心去眼，建議我另外想辦法。辦法有咧想，不而過一想著是幾𨙻 (lo5) 冬。哈，無要無緊是我的悪いくせ (惡癖)。
若佛學我無半撇，但閣下惜台灣、對母語的投入參深入，我有影感佩，實在話。
===============
關於《琉球官話課本研究》我完全無了解，照書籍簡介、《琉球官話課本簡介》以及《官話問答便語》書影的材料，個人的感覺這本冊會使讀。
比論講，咱會當 (e7 tang3) 發見 (tsia5「見」愛變調)：
「習、襲」共 (kang7) 音，但無代表當時ia2有入聲的存在。
「皆=該、兼=間、期=欺」看未出來是毋是見紐已經產生顎化，不過，「兼=間、漸=賤」會使確定合口鼻音韻尾已經消失。
「愧=貴」，見紐無送氣，這較心適。照《漢語方音字彙》20個方言點，「愧」除了蘇州發濁音 [g-] 以外，其他包含太原 (晉語)、溫州 (吳語)、雙峰 (湘語)、廣州 (粵語)、福州 (閩語) …… 無徦一位毋是發送氣的 [kh-]。但「貴」卻計讀無送氣的 [k-]，包括蘇州的文讀 [kuᴇ] (話音唸 [tɕy])。個人認為，對平山「昆明」無讀做「kun1明」的「避諱說」，又佫是一個反面證據。
總 *是，這毋是全面性的看法，欲規下 (kui1 e7) 掌握，必須愛買冊來看。
===============
順續講 *一下：
重脣音是雙脣音，輕脣音號做脣齒音
輔音清濁的區別，簡單講，前者發音的時聲帶無振動 (tsin3 tong7，箸tsia5毋是讀 tsin2 tong7)、純由氣流構成，無帶音，嘛號做「無聲子音」，比論「p-、ph-、b-、k-、kh-、h-」。後者著像汝講 *兮，發音的時氣流受阻、聲帶會振動，是帶音的聲母，嘛號做「有聲子音」，比論「f-、v-、g-、ɦ-」，台語乾若有 [g-]。
[p-] 是重脣清音、無送氣、聲帶未振動
[ph-] 嘛是重脣清音、但是有送氣、聲帶未振動
[b-] 是重脣濁音、無送氣、聲帶會振動
[m-] 是重脣鼻音 (這音汝敢欲試bai7 *咧，看聲帶會振動 *未？)
台語無輕脣音，國語有，像輕脣清音 [f-] (著是注音符號「ㄈ」的音)，一般漢語方言計有較濟，像「發」國語 [fa1]、蘇州話 [faʔ4]、客話 [fat4]；咱是 [huat4]，[h-] 是喉清音，喉濁音是 [ɦ-]，咱無 [ɦ-]，吳語有。[v-] 是輕脣濁音 (著是violin [vaɪəˈlɪn]、five [faiv] 的 [v])，客話、蘇州話攏有，像「武」攏唸 [vu2]，國語發無聲母讀 [u3]，台語唸 [bu2]，[b-] 是重脣濁音。
所以 [ph-]、[th-]、[kh-]、[tsh-] 的「h」是代表送氣，毋是濁音。IPA的正式標法是 [pʰ-]、[tʰ-]、[kʰ-]、[tsʰ-]，tsia5細字的「ʰ」囥箸無送氣聲母正朋的頂頭，「ʰ」有人用細字「，」代替。 (這段是個人對台端https://www.youtube.com/watch?v=gvhWtvqZ63E 部分內容的感想)
「藕」《廣韻》五口切，疑紐。「蓮藕」台語是「蓮gauN7 (ngau7)」，毋是「蓮au7」。讀「蓮au7」著像今仔一寡少年兮「五、牛、阮、我」講做「oo7、u5、un2、ua2」。
「後、厚、后」《廣韻》攏是「胡口、胡遘」兩個音切，三字共音；《說文段注》講「經傳多假后爲後」，台語話音「后」哪會無發「-au」，我未曉。「後、厚、后」文讀有兩款，hio7是偏泉音，偏漳音是唸hoo7，偏廈門音亦是唸hoo7。
讀hoo7箸文獻上真容易看 *著，比如《台日大辭典》、《廈門音新字典》。
「hoo7」這個音現仔時 (hien7 tsir2 si5) 嘛有人用，比如「後來」柯媽攏講「hio7 lai5」，阿「皇后」伊應該是講「皇 hio7」。但嘛有人講「hong5 hoo7」。《葉青歌仔戲--皇甫少華與孟麗君》(https://www.youtube.com/watch?v=lc7PAu-cu4I&list=PL8MwjIpV5cFVzi1q8q95pYcWUiXYBnNUF) 內面著有，阿這內底的字幕參發音無講100%的標準，譬喻「印證」唸「ing3證」、「險象環生」字幕做「險象還生」等。不而過，𪜶通篇傳統的偏漳腔，雖難免有濫著偏廈腔佮偏泉腔，但亦值得傳看欣賞；當然，戲腳 (hi3 kioh4) 是一流兮，齣頭更不在話下，誠久以前我著有這個DVD，百看不厭。我欲講的是，「王后」台語唸「王hoo7」嘛會通。(這段是個人對台端 https://www.youtube.com/watch?v=ENzFDHbjp5w 部分內容的感想)
另外，「禮數」是通用語，《萌典》頂頭著有，《漢典》寫了佫較清楚，伊講是「禮節；禮貌的等級」。台語「厭」若像毋是讀「ien3」，「厭氣」著是「討厭」，《萌典》嘛有。「給父母歡喜」，普通話很少有這樣的句型。這我著無偌理解，「給朋友驚喜、給他們機會、給孩子快樂的童年」敢毋是普通話？
以上是個人的看法，無一定正確，罔趣味著好。
2016年7月18日 上午8:46。
沒有留言:
張貼留言