九０年代以來校園台語文運動概況-2

九０年代以來校園台語文運動概況-2

學生台灣語文促進會

2. 運動回顧

佇chia[這裡],將一寡卡重要的活動,照時間的順序列出來。其中有的部分,內容可能佇各校簡史的所在有提起過,總是, 這部分以台語文運動的角度,將卡有意義、卡重要的代誌整理出來。透過按呢的整理,希望會凍予大家了解著這段時間以來, 攏總做了外儕代誌,嘛提醒目前塊拍拚的朋友,有啥麼代誌是益未完成, 需要繼續去做的空課。

2.1 90' 年

2.1.1 用台語寫批

這是交大台研社所發起的,鼓勵社員佮台南神學院的朋友通批。台南神學院是體制外的教會學校,必修白話字。交大台研社藉這項活動,予大家對台語文感覺趣味,提高學習的意願。

這段故事,《台灣文藝》第122期(1990.12)p112-117有紹介。

2.2 91' 年

2.2.1 Email( 電子郵件) 頂面使用白話字

彼個時陣猶無時行BBS, 電腦網路抵開始流行無外久,真儕連線的大電腦袂凍使用漢字,所以一般使用Email,攏是以英文為主。

交大是理工學校,電腦的使用卡普遍,交大台研社的朋友設一個 mail server,成立一個團體,加入的人,使用白話字來溝通[註],伊所寫的批,送去mail server了後, mail server會將這張批轉予這個團體每一個人,大家著透過這款方式來交流、討論問題。

透過Email,看白話字、寫白話字變做生活的一部分,因為使用的時間增加,對參與者白話字的功力有真大的幫贊。同時,咱嘛舉這個實際的例來表明,佇某一寡場合內底,拼音式的文字有伊的必要性。

這其中有一段插曲,台大台語社創社初期,創社社長謝明城推拺許曹德的書寫法(類似韓國的諺文),後來因為mail server的設立,社員開始看批、寫批,因為感覺趣味,後來許曹德彼套煞拺無啥會行。

另外一項卡重要的代誌是,因為佇電腦頂面拍電腦有困難,所以大部分情形下, 攏無使用調符,驚人讀無的時陣,才用數字益是[或是]其它符號來表示,符號是:第二聲「'」第三聲「`」、第五聲「^」、第七聲「~」、第八聲「'」,鼻音用「*/N/nn」, 圓的o 用「ou/ou」。除了這寡改變以外, 嘛試驗將調符提掉是毋是對讀的速度有影響。因為社會上有一寡人反對使用白話字的部分原因是電腦歹處理,但是佇Email頂面的實驗提供一寡解決的方案,嘛有參與制定TLPA(台灣語言音標方案)的老師,對chia[這裡]的實驗得著啟示,所以改變原來反對白話字的態度。

因為Email 是國際性的,透過推廣,嘛因為按呢熟似美國台灣學生社[註]的幹部, 後來《台語學生》雜誌發行,著有透過台灣學生社佇美國招訂戶。嘛捌[曾]有這個團體的成員將白話字的批送去tfdg討論群[註],致使引起一場關係台語文使用的論戰,予大家對台語文運動有機會做進一步的思考。

目前Email益閣有塊運作,mail server一開始設佇交大電子物理系,後來閣有徙位, 目前佇中央研究院資訊所 ( taigu@hp.iis.sinica.edu.tw ),有六十幾個人參與。

[註]白話字著是教會羅馬字,嘛會使稱呼做台語羅馬字。

[註]台灣學生社的台灣留學生佇美國所成立的組織,聯絡各校的台灣留學生社團的組織。

[註]tfdg是 Taiwan Future Discussion Group的縮寫,成員以佇美國的台灣留學生為主,嘛是一個mail server,使用英文,透過Email來傳消息、討論問題。

[註]這部分的資料,有部分做編刊物的材料,所以有留落來,會使參考《台語風》第一期(交大台研社、清華台研社,92.2)、《台語學生》第21期(學生台灣語文促進會,94.12.25);另外, 台灣文化資訊站(BBS站,140.113.16.61)內底的loeng討論區嘛有收集一部分。

2.3 92' 年

2.3.1 清華、交大梅竹賽台語辯論比賽

清華、交大每一年攏有辦梅竹賽。92年的梅竹賽,梅竹賽委員會佮交大、清華台研社聯絡,希望會凍來辦台語辯論比賽,咱當然是真歡喜,嘛開始塊傱。因為咱認為客話嘛是台語的一部分,所以按算分福佬話佮客話兩組來進行, 結果委員會認定台語是指福佬話,所以反對客話部分的比賽。因為按呢,後來著退出梅竹賽來抗議。

退出了後,著向社會募款,家己來辦辯論比賽,92年3/6下晡佇清華舉辦,猶原辦了真媄氣[sui2-khui3,漂亮],參與辯論的,包括交大台研社、清華台研社、台大台語文社、台大客家社、師大客家社。交大客家社嘛佇這工[kang]宣佈成立。

2.3.2 舉辦台灣語文系列比賽

一開始是由淡江台語文社主辦,93年(第二屆)開始由學生台灣語文促進會佮淡江台語文社合辦。比賽內容包括徵文比賽、歌謠比賽、演講比賽……等等。其中,卡重要的是徵文比賽,原則上規定得過獎(前三名)的學生袂凍參賽, 著是為著欲鼓勵新人。徵文比賽對鼓勵學生從事台語文學創作,有一定的貢獻。

到目前為止已經辦了四屆。[註]

[註:]第一屆的得獎作品刊佇《台灣文藝》第132期(92.9.1);第二屆得獎作品刊佇《台語學生》第19期(94.1.15);第三屆得獎作品刊佇《台語學生》第22期(95.2.25);第四屆得獎作品部分刊佇《茄苳台文月刊》創刊號(1995.5.28)

2.3.3 學生台灣語文促進會成立

經過幾個月的籌備、走傱,學生台灣語文促進會佇93年5月成立,伊是各校台語文運動的學生聯合組成的組織。

因為有這個組織的成立,提供各校一個真好的交流機會,所以學生的力量有法度踏出校園做一寡跨校的活動,完成一寡卡大的工程,可比台文工作者採訪計劃、縣市長候選人母語教育態度調查……等等。

2.3.4 編《台語學生》雜誌

學生台灣語文促進會成立了後,幹部中間對是毋是愛辦一份機關刊物一直有無仝的意見,後來經過其中一寡幹部做伙討論的結果,決定欲辦機關刊物《台語學生》。

到目前為止,譜譜仔會凍分做三個時期。第一時期主要只是試驗的性質, 92年7/10開始,佇歇熱的兩個月中間,先編四期的試刊號,半個月一期,由台大、交大、淡江來負責, A4 size 12--20頁。

第二的時期正式出刊,向社會徵求訂戶以及經費的贊助,ui3[從]9/10創刊,一個月三期,由台大台語社、成大台語社、清華台語社、交大台研社、台大客家社、淡江台語文社、實踐台文社等輪流來編,A4 size,16--24頁。

1--18期每期印五百本,台文通訊社陳豐惠幫助真儕,每期送印刷廠,大部分攏是伊鬥相共。訂戶尚儕的時陣有三百外個,因為訂戶無儕,運動性的目標卡無達到。

這份刊物有以下一寡特色 :

(1)完全家己拍字。按呢做,除了是為著欲省錢以外,主要嘛是欲予負責刊物的人練習使用台語輸入法[註],按呢嘛會凍省去真儕校對的精神,因為一般台語的文章,挓去予拍字行拍字, 轉來通常攏是錯誤歸大拖。

(2)用字無規範,因為阮感覺台語的文字益未統一,無需要了傷儕精神塊討論用字問題致使減少創作量。所以這份刊物嘛會使講是第一份無要求用字、拼音系統愛一致的台語刊物。當然,這種方式的好bai2[壞],見仁見智,看欲按怎想。

(3)因為出刊的時間真捷[chiap8,頻繁],所以,內底所刊的文章是部分是逼出來的。刊物出了捷,對主編、參與寫作的人佮拍字者攏加減造成一寡壓力,但是換另外一個角度來看,逼稿的過程雖然痛苦,無的確一篇特出的作品著是按呢來出現。

(4)學生刊物無發稿費、無算工錢,閣因為出了捷,會凍予人感覺著學生認真塊拍拚,所以這段時間落來,扣去印刷費、郵寄費,加上訂費佮捐款,攏總留六萬外箍落來,透過這筆經費, 後壁一寡代誌會凍繼續做。

當然,每一項代誌,有好的一面,嘛有bai2的一面。為著編刊物,大家將儕儕的氣力攏投佇chia[這裡],相對來講,著卡無做其它的代誌。另外,因為編刊物,嘛影響著學生台灣語文促進會的運作,因為根據章程,會長一學期一任,因為編刊物是真忝[thiam2,累]的代誌,致使一學期了後,無人願意出來接會長的這務,後來會長任期才改做一年一任。

刊物的第三時期是佇第二任會長任期內底,改變方式,將《台語學生》改做季刊, A5 size,74-128頁,減少行政事務的負擔,出刊物的壓力減輕,但是相對來講,各校的互動嘛減少。

目前已經出到22期[註]。

[註]所使用的台語輸入法,是使用鄭良偉教授所開發的TW301台語輸入法,架佇倚天漢字系統下面的詞庫輸入法,這套軟體對學生有真大的幫贊。

[註]試刊1-4佮1-18期按算欲出合訂本,總是經費的問題,暫時益無出;19-22期會使佇台灣的店佮台笠出版社買著。

2.3.5 退稿事件

92年,真儕學生朋友參加自立報系所主辦的鹹份地帶文藝營,而且參加營隊所辦的徵文比賽,學生的台語作品得著真儕獎,包括散文組第一名明哲,散文組第三名允言,佳作冠樹,小說組佳作滷卵。

抵得獎的時, 攏感覺真歡喜, 這寡文章原本愛佇自立晚報本土副刊刊出來, 但是, 煞予副刊主編林文義來退稿。林文義共咱講的理由是,因為副刊的文章太儕, 刊袂完,所以得獎作品 kan-na[只]欲刊得著首獎的作品。但是, 後來竟然發現, 新詩組第二名(北京話寫的)刊出來, 第一名 (福佬話寫的)作品煞予伊來退稿。

消息刊佇第三期《台語學生》了後, 成大的烏皮佮促進會會長聯絡, 然後寫批予自立報系發行人吳樹民先生抗議, 希望尹會凍予咱一個交待,若無咱欲發起拒訂自立晚報的活動。

吳樹民先生將抗議批轉予林文義, 林文義才寫批予會長表示是伊的失誤, 後來將明哲新詩組第一名的作品刊出來。

ui3[從]這個事件咱嘛會凍感覺出, 台語文的作品佇報社來講, 益閣毋是真受歡迎的物件, 對尹來講, 尹認為台語文章, 大家寫法無仝, 寫了真儕人看無, 拍字小姐看無烏白拍、錯誤歸大堆, 所以無愛刊台語作品。按呢的態度, 對台語文運動來講是一個真大的阻礙。

但是經過這擺的抗議事件了後,93年佮94年鹹份地帶文藝營,閣有學生以及社會人士的台語作品得獎, 結果本土副刊攏有刊出來[註]。

[註]學生部分,淡江的為文佮明庭佇93年佮94年攏有得獎。

2.4 93' 年

2.4.1 參與台文通訊聯誼會

《台文通訊》雜誌社 ui3[從]91年佇美國加州創刊,是一份運動性、草根性的台語刊物, 92年開始設台灣聯絡處,並且開始佇各所在成立聯誼會,大家一個月揀一日聚會,互相熟似,做伙讀台語文章,鼓勵創作,有的所在聯誼會辦了真成功,有的譜譜仔。

其中,新竹的聯誼會,交大台研社佮清華台語社有參與,而且運作了袂bai2 [boe7/be7-bai2,不壞]。但是,目前並無繼續。

2.4.2 要求將台語列入通識教育課程內底

長期以來,台語社攏會開台語班教人講台語、寫台文,但是開班的結果往往參加人數真少而且流動率嘛峘,社團投入真大的精神佮成本,造成的影響佮效果嘛有限。所以開始有人思考欲野球通識課程開台語課,透過正式的課程來招學生,予大家了解台語毋na7[不但]是日常的生活語言nia5[而已],嘛是一個有深度的學問。

93年台大台語社、客家社、原聲帶社聯合發表一份聲明,要求教育部廢除無合理的共同必修科目,增加通識科目的學分,並且將台語(包括福佬話、客話佮原住民語言)佮台灣史囥佇通識課程的體系內底,並且佇每一個學術研究的領域當中開闢台灣研究,建立台灣研究佇學術中獨立自主的地位。這份聲明的聯署團體包括:台大台語社、客家社、原聲帶社、大論社、勞工社; 交大台研社、客家社;清華台語社;成大台語社;淡江台語社、實踐台研社;逢甲客家學社。

台大首先佇93年5/25踮佇學校大門口舉辦「校園本土化」座談會,邀請台大數學系黃武雄、外文系江文瑜、歷史系吳密察、土木系蔡丁貴老師參與座談,要求台大校方尊重咱的心聲佮訴求,會凍突破教育部的壓霸限制,獨立安排大學的課程。

佇93年下半冬,台大學生繼續佮通識課程改革小組的教授溝通觀念,說服教授接受咱的意見;但是小組並無實際權力,所以目前的改變無外大,共同必修課的本國歷史有吳密察老師開的台灣史課程予學生有選擇的機會,欲選台灣史的學生非常儕,可惜校內師資無夠,無法度予所有的學生攏來上課。

93年9/19,學生台灣語文促進會佇新竹召開會員大會,決議要求各大學開設台語文課程。教育部已經佇中小學進行課程改革,予中小學學生會凍學習鄉土文化,大學生嘛應當有這個權利學習家己的母語文化,像清華、成大攏捌開過台語文的課程,學校並毋是無開台語文相關課程的師資佮條件。所以促進會決定欲以演講佮發動校內同學聯署的方式要求各校開設台語文課程。

但是最後並無實際串連……

另外,淡江方面,淡江每一學期攏有學校當局所辦的社團負責人座談會,淡江台語社連續幾學期攏提出要求開闢有關台灣本土的課程,包括台灣語言、歷史、文學、新劇、歌仔戲、布袋戲等課程。後來學校方面有陸陸續續開課,但是學校的限制實在真儕,又閣牽拖選修的學生只是少數人。

2.4.3 辦高中生台語營隊

語言的學習,ui3[從]愈細漢開始效果愈好。咱塊做台語文運動的時,發現著真儕大學生的觀念攏卡固執,毋願意改變、放棄長期使用北京話的慣勢[koan3-si3,習慣],假使會凍予尹卡早接觸著疼惜母語的觀念,尹可能卡著袂才呢[chiah-ni7,這麼]固執;所以台大台語文社佇辦過兩屆大專學生的台語生活營以後,93年決定開始向高中生湠[thoaN3,繁殖]根、掖[ia,播]籽。

93年7/16-19,台大台語社佇金山舉辦第一屆高中生台語生活營,學員大約有30人, 除了安排台灣歷史、政治、文學、歌謠、環保、民俗這寡課程以外,歸個營隊的活動攏是使用福佬話來溝通,真儕學員無啥會曉講福佬話,嘛有客家朋友來參加,大家攏真認真欲共福佬話講好勢[ho2-se3]。營隊結束了後,其中一個學員董耀鴻著決定佇大同高中成立台語社,這是台灣第一個高中的台語社。

94年,台大台語社繼續舉辦第二屆高中生台語生活營,地點佇新店花園新城, 課程的安排包括俗語、文學、平埔族研究、傳統戲劇等,這擺安排卡儕時間來教學員如何使用羅馬拼音寫出福佬話。這擺北一女補校的一寡學生為著欲佇學校成立台研社,特別來參加營隊、交換意見; 景美女中的台研社嘛有學生來參加。營隊結束了後,參與營隊的學員繼續聯絡,決定組織一個「高中生台灣語文促進會」,聯合各校關心台灣語文發展的高中生做伙來做一寡代誌,並且閣去綠色和平台灣文化廣播電台接受訪問,當場引起聽眾熱烈的反應,紛紛要求台大台語社閣辦一個梯次予其他想欲參加的高中生會凍參加。

95年台大台語社預定繼續舉辦第三屆高中生台語生活營,開發高中的台語文人口,向望[ng3-bang7,希望]未來每一個高中攏有台語社,然後會凍閣慢慢佇國中、國校推拺,透過學生自覺的行動,來改變現此時的教育體制,真正落實台文的草根運動。

2.4.4 台文工作者採訪計劃

這個計劃由學生台灣語文促進會第一任會長佇研究所抵畢業彼年提出來的,想欲利用歇熱的時間,招學生台灣語文促進會的朋友共同來進行這項大工程。

這個採訪計劃背後有一寡企圖。對學生這爿來看,主要是:

(1) 透過舊人抴新人的方式,交接一寡佮台文工作者的人際關係,透過採訪, 予學生佮工作者熟似;

(2) 想欲儘量招一寡各校台語社新社員,希望借採訪的過程,予這寡新的腳仔卡緊進入狀況,來受工作者拚勢的精神感染,認真來思考台語文字化的問題;

(3) 一寡工作者,可能因為觀念的無仝,會互相攻擊;透過採訪,希望學生加減聽, 有一個全面的的了解;因為這寡學生,以後可能會繼續做台語,而且有可能佮目前的工作者做伙做代誌, 若欲合作,總是愛對對方有初步的了解;

(4) 尚重要的,希望負責人會凍藉這擺的採訪學著一寡實際的物件,整理錄音帶、用台文處理chiah呢[這麼]長的文章、ui3[從]整理的過程加減學一寡台語詞(這寡詞負責人可能毋捌用過、講過)、用整理好的採訪稿佮受訪者建立進一步的關係。

對歸[整]個台語界益[或]是社會的角度來看,主要是:

(1) 藉採訪來肯定工作者的拍拚,共工作者做精神上的鼓勵;

(2) 互相的溝通、交流,予大家閣卡知影別人塊做啥麼,儘量避免人力資源的浪費;

(3) 尚重要的,大環境予咱的束縛真大,一般台灣文學界,普遍的攏看台語文無夠重,尚明顯的例,尹塊整理台灣文學史的時,差不多攏袂去講著台語文學的部分,雖然這才應該是正統的台灣文學。換另外一個角度來看,文字習慣的改變,對一寡人來講總是無hiah呢[那麼]簡單,既然尹無欲整理台語方面的物件--可能尹貧憚[pin7-toaN7,懶惰]益是尹無這個才情--按呢咱家己來整理。

分工的方式是每一個人負責一個以上的工作者,先聯絡工作者,確定拜訪的時間,招一陣人做伙去。採訪了後,愛寫一篇報告出來,原則上,報告愛包括:工作者簡單的基本資料、經歷;對台文基本的態度佮觀念;已經做過,益是正塊情形中的計畫,這寡計畫的情形;過去捌構想過, 但是後來無實行的計畫(無實行的原因);短期來按算欲做的計畫;假使欠腳手,需要啥麼款的人才,做啥麼款的代誌?整理者簡單的評論。

會使講是欲替台語文運動者做尹的傳記的一部分,但是重點囥[khng3,放]佇尹對台語文運動所做的付出佮尹對台語文運動的理念佮態度。

採訪計劃ui3[從]93年7/9開始,到9/5暫時告一段落,攏總進行13場的採訪,14個工作者。其中四篇採訪稿到10月底益未交出來,所以kan-na[只]處理有交出來的9篇。12月初拍字、校對完成,但是煞找無出版社願意出版,接接[chih-chiap,接觸]過的包括前衛、自立、旺文、吳三連基金會、林本源基金會,因為按呢延[chhian]一冬去,到94年年底才有台笠出版社願意出版,佇95年2月正式出版。

整理出來的工作者包括洪惟仁、林央敏、黃元興、陳慶洲、陳雷、羅文傑 (鄭良光)、吳秀麗、林宗源、陳冠學等九人,有採訪、但是無整理出來的,包括鄭良偉、林錦賢、陳明仁、陳豐惠、陳義仁等五人[註]。當然,台語文運動者並毋是kan-na[只]這擺採訪著的這寡人 nia[而已],益閣有真儕真儕,總是人力、時間有限。希望這項有意義的空課未來會凍繼續做落去。

[註]無交出來的採訪稿中,鄭良偉部分刊佇《台語學生》第20期(94.3.15)陳明仁、陳豐惠部分刊佇《台語學生》第21期(94.12.25)

2.4.5 縣市長候選人母語態度調查

92年年底立法委員改選, 淡江台語社社員任冠樹佮台大台語社的朋友提出對各立委候選人母語教育的態度調查,希望借選舉的時機,向未來的立委施壓,立委候選人表態的結果會凍予選民嘛做伙來注意這個問題。但是因為時間傷[siuN,太]迫[pek],計劃袂赴[boe7/be7-hu3,來不及]實行。

93年台灣省各縣市改選縣市長,既然中小學的課程,縣市長有權力家己[ka-ki7, 自己]來安排,所以掠[liah8,抓]這擺的機會,決定佇93年針對全省20個縣市的縣市長候選人進行採訪調查, 分北、中、南三區,由學生台灣語文促進會的朋友分頭負責。

調查的結果,民進黨籍的候選人差不多攏非常支持母語教育,國民黨籍的候選人大部分嘛攏表示願意推行,只有新黨的候選人認為母語教育無必要。但是支持母語教育理念的候選人嘛普遍提出一個問題,著是文字標準化的問題,煩惱每一個縣市個人制定一套文字,以後大家使用的文字有可能會袂通。

但是咱認為,佇台文猶未[尚未]定型進前,若是用官方的政治力量來制定一套標準, 可能會阻礙台文繼續實驗創新的機會,所以主張暫時會凍予各縣市自由編寫適合在地人文、地理的教材,等到以後,才運用使用比例尚峘[koan5,高]的文字做台文的標準。

調查結果,佇93年11/16踮[tiam3,在]立法院召開記者會公佈佇媒體大眾的面頭前。

選舉結束、新任的縣市長上任了後,民眾日報將採訪著而且當選的新任父母官的母語態度再次公佈,刊佇民眾日報12/27第五版的專題報導,提醒選民注意監督尹施政愛兌現的保證。

調查報告的資料,全部刊佇《台語學生》第20期。

2.5 94' 年

2.5.1 協辦台語文學營

這是一個佮社會上台語文運動合作真好的例。94年,學生參與兩個台語文學營的協辦空課,第一是2/16-20,番藷詩社佇南鯤鯓所辦的台語文學營;第二是8/3-6,台中市台灣語文研究社佇台中所辦的台語文學營。

學生普遍卡無錢,所以參加社會上所辦營隊的意願相對來講卡無,但是協辦營隊, 學生因為做工作人員,省去報名費的開銷,佇營隊鬥腳手, 雖然卡忝, 但是同時嘛會凍互相做交流, 而且替營隊帶來真儕活力, 予營隊閣卡生動、活潑。

2.5.2 參與民主電台,製作台語節目

為著抗議國民黨政權的媒體控制,93年開始有民主電台出現,94年開始真儕電台設立,鬧熱滾滾,對台灣的政治社會生態有真大的影響。

台語文運動,一直缺欠媒體的照顧,對這個新興的媒體,開始有一寡台語文運動者來運用這個媒體,總是文字化的運動,若是欲透過聲音來傳達,效果可能會扑一寡折扣,但是,畢竟伊是一個會凍來試的媒體。

社會上的台語文運動者,已經有人投入這部分,包括台文通訊社、台灣國台語文運動組織、台中台灣語文研究社……等等,學生這爿[peng5,邊]嘛開始有人來參與。

交大台研社94年9月開始佇清華電台(校園的電台)做「黑貓俱樂部」,福佬話、客話攏有,主要是以歌謠、民俗為主。

淡江台語文社94年10月佇群眾之聲做一個兩點鐘的節目,號做「鹿仔的故鄉」, 內容以探討台灣文史、族群關係為主,嘛有開闢20分鐘的客語教室。但是彼當陣抵好選舉,卡無閒, 所以節目做個外月著暫停。除了家己做節目以外,三不五時嘛會接受其它電台節目的邀請,包括寶島新聲、綠色和平、台灣國、基層之聲、淡水河……等電台。

台大台語文社佇95年3月至5月,佇台灣之聲製作主持一個「台語俱樂部」的節目,內容包括台語歌曲、歌謠創作者的紹介,學生台文作品的唸讀,台灣民俗的紹介(歌仔戲、車鼓、布袋戲),討論……等等。

台大台語文社嘛佇7月份開始欲佮緯衡有線電視合作,製作一個「台灣話敢仔店[雜貨店]」的台語節目,內容包括台灣漫談(用開講的方式來紹介台灣的禮俗、四句聯仔, 傳說等),歌謠教唱(借紹介歌謠的過程,欣賞歌詞的內容兼做台語教學),文學對談(以讀者的角度佮台文作者對談)……等。

2.5.3 參與410 教育改革

410教育改革聯盟, 佇94年4/10辦一場遊行,而且對教育問題提出尹的主張佮訴求。

台大客家社招台語社來參加強調「教育改造」的活動,因為咱做的真儕 [chin-choe7/che7]拍拚,終歸尾攏會使牽轉去教育的問題。

雖然開過幾擺會了後,卡發覺尹主要的四個訴求──落實小班小校、廣設高中大學、教育現代化、制定教育基本法等等,攏無咱通好發揮的部分,總是決定參加活動,加減將咱的聲音發出去,予關心的朋友來思考。

活動彼工排一個擔,賣台文教材、台語冊、錄音帶、錄影帶……等,台文通訊社的朋友嘛有來鬥相共[tau3-saN-kang7,幫忙]。

活動結束了有一個檢討會,請大家提出書面意見,交予制定教育基本草案的人。台大客家社佮台語社共同發表一份聲明,要求母語教育提升到憲法所保障的基本人權之一。毋過, 煞[soah,卻]攏無消息去。

2.6 95' 年

2.6.1 台灣文化資料庫

台灣文化資料庫是一個ftp server[註],伊的前身是交大台研社台灣文化資料庫,後來閣繼續架設gopher server 佮 BBS。

基本上,這個資料庫自94年年底成立到目前已經小可有一個規模出來。其中,有一部分收集著的資料是台語寫的文章,包括福佬話佮客話,這寡文章,包括創作、翻譯、論文、民間文學採集等等方面的物件。

因為這是國際性的,意思是講,佇國外的朋友會凍透過連線的電腦來這個站找伊需要的資料,尤其對這項物件有趣味的人,以少年家仔為主,會使講是一個真新的媒體。

台灣文化資料庫的 IP addr. 是 140.113.216.61 (twserv.nctu.edu.tw)

[註]ftp 是file transfer protocol(檔案傳送協定)的縮寫。