關於是否稱為「台語、福台語、閩南語、河洛語」請參考
http://www.wretch.cc/blog/jacknt0601/14171288
以下本文引自《學生台灣語文促進會》http://203.64.42.21/iug/ungian/Chokphin/90/90-1.htm
九０年代以來校園台語文運動概況-1
學生台灣語文促進會
1. 各校概況
這部分是各相關社團的簡史, 因為聯絡空課[khang-khe3/khoe3,工作]毋是做了真好,有一寡[些]學校的資料無齊全,希望未來會凍 [e7-tang3,可以]繼續補充。
1.0 背景
每一個學校的環境,差異性其實攏 [都]真大,仝一間學校佇無仝時陣,情形可能著[tioh8,就]無仝款;仝一段時間,無仝學校的情形嘛差真儕 [choe7/che7,多]。若是欲來交待大環境,譜譜仔[大略]講起來,87年解嚴佮[kah,和]90年的學運,攏對校園有一寡刺激的作用。
本土性的社團,會凍[e7-tang3,可以]做的議題有真儕,這寡議題包括勞工、環保、女性主義、台灣歷史、傳統戲劇、族群關係、經濟發展、采風……等等,台語這個議題,範圍卡狹 [oeh8/eh8]感覺起來嘛那像卡無趣味,尤其寫台文閣牽涉著生活方式的改變,一般的儂,普遍有一個態度, 假使伊袂曉[boe7/be7-hiau2,不會]講台語,伊感覺無這個社團無存在的價值,假使伊會曉講台語,伊閣認為我會曉講著好,哪著閣來參加這種社團,推廣本身有卡困難。所以,假使一間學校有幾lo7個本土性的社團,通常台語社並毋是第一個成立的,但是台語社的成立,會凍表示,參與本土性社團的學生,已經開始注意著文化基礎這個尚介[最]根本的問題。
有的儂是受著政治的啟發,開始關心反對運動,對[從]思考當中開始反省文化問題;嘛有部分是本身意識著文化流失的情形嚴重,因為對母語的疼心,才為成立社團來走傱 [chau2-chong5,奔走]益[iah,或]是參加社團。
早期(80年代)市面上會凍找著的資料,對創社者佮參與者嘛有一定的貢獻, 可比洪惟仁、鄭良偉的鼓吹,宋澤萊、向陽的創作……等等,這寡物件對初開始踏入來的學生,做真好的心理建設;顛倒[反而]30年代的台灣話文資料,因為資料卡奧[o3,難]找著,大部分攏是開始做台語文運動了後才來了解這段過程。
1.1 各校台語相關社團簡史
1.1.1 成大台語社簡介
成大台語社佇1988年 10月成立,由一陣教授(有林繼雄、劉至明、簡錦樹、葉光毅、黃俊銘……等等)發起的。成大台語社是全國尚代先成立的台語社。
(1) 1988.10 ～ 1989.8
8年成立的時有八十幾的同學參加,差不多有一半是曉講福佬話的人,所以彼陣有開「會話班」,由都計系葉光毅老師講課,逐[tak8,每]禮拜佇物理系上課,另外嘛有開文書班,由林繼雄、劉至明兩位老師講課,內容是「現代文書法」(拼音文字)。台灣史方面,參經緯社合辦,邀請台灣史專家楊碧川先生講課, 兩禮拜一遍。
春假參經緯社佇台南神學院辦台灣文化營。
(2) 1989.10 ～ 1990.8
這年台文課、台灣史繼續, 增加社會主義的課程,嘛有辦兩遍台語演講比賽。另外嘛辦台語影片欣賞。
另外林繼雄教授佇護理系開「台語現代文」,有兩百幾個同學選課。
(3) 1990.9 ～ 1991.8
這冬台文課、台灣史、社會主義課程繼續,增加客語課,由方元興、林舜元主講。
7月台南一中、二中、女中的學生佇台南神學院辦營隊,拜託台語社共[ka7] 尹鬥相共[tau3-saN-kang7,幫忙],台語社負責的是台文、台灣文化討論、台灣史等。
(4) 1991.9 ～ 1992.4
這年台文課、客語課、社會主義、台灣史的課程繼續。10月辦台灣文化週,邀請陳明章「台灣歌謠之夜」,陳明仁、林瑞明、葉石濤、黃勁連「何謂台灣文化」,陳冠學「台語之美」,楊碧川「台灣四百年史」,番藷詩社「台語詩吟唱」,文化週的時,順續[sun7-soa3,順便]賣台語冊、台語社社服。
出兩期刊物《小西門[sio2-sai-mng5]》。
1.1.2 交大台灣研究社簡史
交通大學台灣研究社是由一陣參與90年三月學運的學生,為著欲改造這個保守的環境,經過不斷的討論, 佇6月初由滷卵提出申請,後來閣經過不斷的爭取,佇10/8來正式成立。因為這個社團並毋是完全做台語文運動的社團, 所以下面所整理的,只有將佮語言問題卡有關係的部分列出來。
(1) 1990.9 < FONT FACE="新細明體" LANG="ZH-TW">～ 1991.1
一開始,大家做伙來讀民主七縣市雙語教育的論文集,包括鄭良偉,許極燉,羅肇錦等等。因為家己變[piN3,搞]無啥有,著決定請人來講演,總共辦了五場,包括: 陳明仁先生「本土教育佮羅馬拼音簡介」、陳明仁先生「趣味的新台語用詞」、洪惟仁先生「簡單實用的台語文字」、許曹德先生佮女王「阮的前半生佮台語文字」、黃春明先生「台灣小說佮台灣話」。平均一場攏有四、五十人, 尤其尾仔三場攏強強欲坐滿一間大教室。每一擺講演上課了攏有影印歌簿教大家唱台灣民謠。
這學期因為選擇福佬話做普通話,所以著開課予[hou7,給]袂曉[boe7/be7-hiau2, 不會]講台灣福佬話的人來上課。是用鄭良偉先生的課本【生活台語】由滷卵來上。參加的學員有僑生、外省籍等等,但是大部分攏是家己社員來捧場。
閣有一項真趣味的活動著是佮台南神學院的朋友用台語文通批交筆友,有十外個人參加,維持差不多兩學期,部分內容台灣文藝有報導。歇寒時,有儕儕社員響應林雙不老師發起的「行出新台灣,建立新國家」的環島行軍,一直行到二二八開學。有兩個社員用台語寫「行軍日記」發表佇民眾日報。
(2) 1991.2 ～ 1991.6
3/26～5/21 的每禮拜二辦生活台語班,同學家己來上課。每擺上課的內容包括:生活台語、羅馬拼音、佳句俗語、民情逸事、小說朗讀、民謠教唱等等。上課前嘛有發通告,整理頂擺[上次]上課的精華佮這擺活動的預告。參與的大部分攏是社員,會使講是大家互相漏氣求進步。
5/8李喬來講「台灣人的懦弱性格分析」為著欲尊敬這位為台灣拍拚的客家作家。有社員走去市內做田野,採集一條客家歌「天公落水」。經過大家事前的練習,佇講演前,大家著唱這條歌共[ka7]伊歡迎,予人印象深刻。
佇戶外的活動方面有陳明章的台灣流行歌演唱會。
(3) 1991.7 ～ 1991.8
佇 5/4反核遊行時抵著[tu-tioh,遇到]成大台語社佮台大台語社的朋友,相招7月欲來辦一個台語文社的整合營隊,拍算後學期起開始欲向學校抗爭,要求開台語文的課。尾仔滷卵去參加台大台語文社辦的營隊,抵著王振義老師,著一個扭[giu2,拉]一個,大家攏去大龍峒扭[giu2,拉]弦仔、彈月琴、唱歌仔戲。歇熱時嘛佮台大台語社的朋友組日本時代台灣文學的讀冊會,經過十擺的討論,大家決定欲用台語文來翻譯佮創作。尾仔嘛去參觀台灣新文學之父賴和紀念室佮採訪捌[bat,曾]用過台語文寫小說的宋澤萊先生。 8月時,台研社的朋友閣組團參加鹽份地帶文藝營,嘛有抵著成大台語社的朋友,交換台語文的心得。
(4) 1991.9 ～ 1992.1
9/24王振義老師來講演「台灣歌仔之水」。10/18佇大禮堂前舉辦「唸歌之夜」,有邀請著台大歌仔戲社佮師大、清大的同學做伙來演出。唱煞馬上就舉辦交大台灣歌仔戲社的成立大會。歌仔戲社除了固定每禮拜三、四的團練,每禮拜六攏閣到台北大龍峒保安宮練習。佇王振義老師的指導下,並佇 9月佮12月分別佇誠品書店佮台大門口唅(ham5,和)其他學校的同學做伙來演出。
除了唱歌這學期的常態活動閣有「浪淘沙」讀冊會,這是一部台灣歷史、台語對話的大河小說。尾仔真難得嘛邀請著作者東風白先生來座談(旅居加拿大)。嘛有客語班的開課,由客家的同學準備、上課。包括語言、歷史、歌謠的紹介。上課的人真儕,包括福佬、客家一半一半, 嘛有三、四個老師來做伙上。
其他的講演閣有林央敏先生「台灣文學的面相」。
因為交大的網路真發達,使用電腦閣真方便,所以平時同學著定定用電腦來交換資訊,有時嘛佮國外的朋友宣揚台灣著是台灣,台灣非中國的觀念。因為毋是大家英文攏真好, 加上大家嘛攏會曉台語羅馬字,所以有時著用台語佇網路頂來交通。後來感覺真方便,尤其會使真方便佮清大的同學來交換資訊,譬如講是某某人的講演等等,著學TFDG(Taiwan Future Discussion Group) 設立一個 Discussion Group(討論會), Mail server著設佇「taigi@ep.nctu.edu.tw」。
後來有漸漸儕人來加入,有台大、成大、中央佮中央研究院等等,漸漸閣有美國的留學生,連夏威夷的鄭良偉教授嘛加入這的討論會。後來嘛設立客家的Discussion Group 「hakka@ep.nctu.edu.tw」[註]。
其中,部分的內容攏刊佇清大佮交大合出的《台語風》內底。
[註]這兩個討論會目前已經攏無塊運作a,請參考2.2.1。
(5) 1992.2 ～ 1992.6
歇寒時陣,交大辦一個「台灣文化營」,有儕儕台語文社的朋友來參加。包括台大台語文社、客家社、成大台語社、清大台研社閣有中興、政大的學生等等。經過幾工的討論,決定欲佇5月來成立「學生台灣語文促進會」。同時交大佮清大台研社決定欲接辦梅竹賽台語辯論的節目。後來因為校方無認同客語也是台語的主張,無同意辦客語辯論,兩校台研社決定罷賽,並請擴大邀請台大、師大台語文社佮客家社做伙來參加。
佇新竹辦了兩場生動的台語辯論比賽。由交大、清大聯隊出戰台大、師大聯隊。福佬話的題目是「北京語是毋是台語」。客語題目是「客語係毋係愛文字化」。因為交大台研社客語組有真濟人投入這擺的活動,著佇比賽了宣佈正式成立交大客家社。
佇4月底為著紀念車諾堡事件佮反核四的大遊行,有真儕台語社的朋友來參加, 佇立法院前表演創作的反核歌曲。佇遊行結束了後,交大、台大、成大、實踐、淡江佮中興的同學開會決定欲開始佇歇熱開始來發行刊物,歇熱發行試刊四期,希望開學了有法度每禮拜一期。試刊號部分,交大負責第二、四期的空課[khang-khe3/khoe3,工作]。
(6) 1992.9 ～ 1993.2
9月辦一擺講演, 蘇貞昌「由回饋鄉土到母語教育」。屏東縣因為蘇縣長執政,已經實施國校母語教育,內容包括四種族群的母語。蘇縣長講演除了精彩的講演技巧以外,伊也提供突破現行制度所造成的母語教學的困難,譬如講教材、師資、經費、時間、心態等等。尚重要的是經費的來源,教育部毋肯出錢, 伊嘛有法度預算開甲兩億。會中現場來賓佮講者亦有針對母語教育的環境、時機、方向、方法做熱烈的溝通。
12/5辦全國各大專院校社團台語廣播節目製作研討會,邀請著各校台語文相關社團同齊[tang5-che5/choe5,一起]探討台語節目精緻化,高品質的電視,廣播節目製作相關事項。台語傳播節目長期以來受著國民黨政權的不良政策限制之下,經費、人力一直欠缺,水準也因此無法提昇,所以夆[hong,被]看做是粗俗、低路[ke-lou,差勁]的代表。研討會針對台語節目的內容、語言、技術、市場,邀請各社團來進行探討,並向望[ng3-bang7,希望]提出可行的計劃。來參加的社團有臺大,實踐,嘉義師範,淡江,清華、政大。會中討論,想欲借清華語言所的設備來訓練播音的人才, 由阿仁、阿惠來負責訓練空課。但是後來並無實行。
(7) 1993.9 ～ 1994.2
9/19邀請各校與台語相關的社團到本社來同齊[tang5-choe5/che5]討論台語文運動的發展,並且分享各校的心得, 然後探討未來推拺[thui-sak,推動]的方向。會中並且選出滷卵做學生台灣語文促進會第二任的會長。
學期閣邀請台灣歌謠專家莊永明先生來演講「台灣歌謠的故事」。
(8) 1994.3 ～ 1994.6
邀請楊碧川來講演「原住民的母語傳說」,希望按呢來增加大家對原住民母語現狀的了解。另外一場講演「台灣原住民的過去現在佮未來」,講者Atung Yupas (莊錦秀)是鎮西堡的牧師,捌[bat,曾]寫過【泰雅爾語讀本】佮【泰雅爾族傳說故事】。主要內容有原住民的困境、文化流失、重建原住民的生活形態、未來各族群的互動關係。
按7/5到7/10(因為風颱所以延一工)佮學生台灣語文促進會辦Tayal 生活營, 活動分做兩階段,第一階段以室內教學為主,有講演,Tayal話、Tayal歌謠教學;第二階段是實際的生活體驗,透過長老教會Tayal中會的協助,去山頂(新光)蹛[toa3,住]佇原住民家庭內底,做伙 [cho3-he2/hoe2,一起]工作、食飯、做禮拜。
(9) 1994.9 ～ 1995.2
這段時間是台研社歌謠組成果錄製的實行期間。
(10) 1995.2 ～ 1995.6
這學期的常態活動, 有每禮拜一的台語班,佮每禮拜五的讀冊會,閣有拜三的黑貓俱樂部, 這是佇清華電台的廣播節目。台語班請資深社中大老黃建盛來執教, 這學期攏總教兩種標音方法: 教會羅馬字佮普實台文[註]; 上課真鬧熱, 心適, 閣有一次校外教學去參加洪惟仁先生的演講。這學期的學生比較少年, 有一寡特殊,像合嘴尾音攏真難照音發; eng, in, iN 也無啥會曉分, 毋過若是英語就無問題a。
5/21辦楊梅采風。
[註]普實台文是莊勝雄所發明的拼音系統,是將林繼雄的現代文書法做一寡修改,請參考【普實台文】,前衛出版社。
1.1.3 台大台灣語文研究社
台大台灣語文研究社 (簡稱台語文社),是佇90年6/1成立的,彼當陣台大校園,學生會會長選舉抵[tu2,剛]煞[soah,結束],國民黨的學生當選,佇這個環境下,有一陣平常時關心台灣文化,以講母語為榮的學生,成立台語文社,向望透過社團的力量,結合關心台灣的朋友,做伙來推拺[thui-sak,推動]台灣語言文化,為獨立自主的美麗台灣拍拚奮鬥。
(1) 1990.6 ～ 1991.1
第一任社長是農推系謝明城,社員有50個人左右,包括以福佬話佮客話做母語的同學,因為無原住民同學加入,所以社團暫時無做這部分。10月初新生入來,辦一連續的福佬話、客話講演,有: 李鴻禧「美麗燦爛的台語」、林上超「吟詩作詩話台語」、向陽「用心用愛寫台灣─談台語詩寫作」、洪惟仁「本土語言教育問題的理論佮實際」、羅肇錦「談客家話之現在、過去與將來」、林雙不「我的文學創作歷程」、黃春明「台灣話」。透過這七場講演,推展理念,順續[sun7-soa3,順便]熟似[sek8-sai7,認識]一寡仔朋友。但是,彼當時學校的台語文化風氣益未[iah-be7/boe7,尚未]拍開,來聽的人無真儕。另外,研究生協會嘛有舉辦一寡「台語歌謠」、「台語樂團演唱」、「台語舞曲之夜」的活動,總是一點一滴勻勻仔[un5-un5-a2,慢慢地]做。
開課方面開四個班,攏是福佬話的,有:吳秀麗「台語羅馬拼音班」、林上超「漢詩班」、李元侯「台語古文班」、蔡雪幸「台語生活對話班」。上課毋但是學生, 益閣有一寡外口關心台灣語文的朋友。
12月中出《台灣語文》創刊號,攏總四版,客話、福佬話參北京話,討論著語言平等、雙語教育、本土語言文字化的問題,用家己的母語寫出心聲佮理念。
社團內部方面,學長姊開四個讀冊小組,有語言、文學、歷史文化、台灣歌謠。社員互相學習討論,增加對台灣語文的了解。
年尾,社團走去台南古都拜訪成大台語社,互相經驗交流。歇寒的時,佮元穠茶藝館佇林口辦第一屆台灣語文生活營,講師有林上超、許曹德、吳密察、林玉體、楊碧川、陳明章。講台灣語言、社會、詩詞、歌謠、歷史……等等,講天講地,大家用台語來思考,用台語來生活。
(2) 1991.2 ～ 1991.7
這學期客家社成立, 台語文社著專心舞[做]福佬話的部分。開學進前,配合文學小組的討論,去鹿港拜訪宋澤萊先生, 談論台灣文學。開學了後,照常辦台語講演,請林瑞明、許曹德、黃富、吳密察、邱垂貞講演、唱歌。四個台語班繼續,老師有林上超、李元侯、洪惟仁、蔡雪幸四位。3/15出《台灣語文》第二期,歷史、文學、歌謠的讀書小組繼續。到4月中的時陣,社會上因為不滿國民黨蹧躂[chau-that] 憲法,發起417 遊行,另外,一陣學生佇台大校門口靜坐抗議一禮拜,台語文社嘛參與其中。5月中,阮佮客家社合辦台語週,佇活動中心展覽有關台灣語言的書,閣舉辦全校台語講演比賽。
歇熱的時,辦第二屆的台語生活營,這擺閣有一寡外校的學生來參加。
(3) 1991.9 ～ 1992.2
社長是植物系楊美慧,嘛有新的社辦:活246 ,這學期卡注重社團內部的活動,讀冊小組增加文學翻譯這組。台語漢詩班、台語高級班繼續,由林上超、許曹德擔任講師。
12/12出第三期刊物。這學期新入來的社員不離仔儕,大家誠心交朋友, 做伙做代誌,共社團的基礎拍予閣卡在[chai7,穩固]。佇學期欲結束進前,舉辦全校的台語歌謠比賽。
(4) 1992.2 ～ 1992.7
社長是歷史系林玉梅。歇寒時一寡社員做伙參加台灣研究基金會的營隊(主題:族群關係)佮交大台研社辦的台灣文化營, 熟似真儕其他學校關心台灣語文的社團朋友,大家開會討論欲按怎推拺咱共同的理想,互相透過 Email 聯絡。
這學期台語班繼續,增加初級班,教boe7曉台語的人,讀冊小組增加俗語小組。 3月初佮台大客家社去清華大學參加台語辯論比賽(分客話組、福佬話組)。4月中出第四期《台灣語文》,擴大版面。5月中舉辦台灣文化週,佮學校的客家社、掌中劇團,參外面的團體西田社、番藷詩社、台灣文藝、台語文摘……等等合辦,攏總兩禮拜的時間,一禮拜佇台大校門口搭棚仔表演, 內容有布袋戲、皮猴戲、演詩之夜佮山歌之夜,第二禮拜佇活動中心展覽台語的書,閣播送宮崎駿的台語bang3-ga3(卡通)。5月下旬參加淡江台灣語文系列比賽。台大學生會會長的選舉,台語社推出候選人參加選舉,結果以真少的票數輸予國民黨候選人。6月中欲期尾考的時,校方刁難台語文社佮客家社的社辦,限定6/15進前搬出去,社團方面找學校當局做理性的溝通,但是無路用,只好聯合各社團簽署聲明,佇6/15彼工,社團著遊行到行政大樓靜坐抗議,表達對行政官僚做法的不滿,但是學校並無任何回應。
7月中,去台南安定做田野調查,採集台語的語料。
(5) 1992.9 ～ 1992.12
社長法律系李雪香。出版第五期《台灣語文》。因為台語班開課的招生狀況並無好,無法度達成開課的目的,所以決定暫停台語班。頂學期的台灣文化週得著真儕鼓勵佮肯定,社員對演詩有一寡趣味,所以邀請趙天福老師來教演詩,透過另外一種方式來接觸台語詩文的世界。
長期性的歌謠、俗語佮台文小組繼續進行。
因為社團辦公室的問題,這學期課外活動組刁工[thiau-kang,故意]阻礙台語社辦活動的申請,並且停止對社團的補助,大家認為這毋是單純的事件,應該是政治迫害。年底,學校將台語社佮客家社社長送懲戒委員會議處,會議結論是,對這個問題無校規的約束,只是建議尹搬走。但是大家認為理由無夠充分,決定無愛搬。
(6) 1993.1 ～ 1993.8
這學期將關懷的層面放閣卡闊,希望除了繼續學習、了解傳統文化以外,會凍對新的思想佮社會面對的現實問題做進一步的探討。所以社團新開一個「性別小組」,研讀一寡女性主義的文章,進一步反省、探討佇台文運動當中兩性的地位佮權力關係。
除了性別問題以外,閣將大部分的時間開佇探討族群問題頂峘。佮原聲帶社 (原住民的學生社團)、客家社做伙舉辦四場座談會,討論各族群所面對的文化、政治、語言種種問題, 互相交換意見,並且進一步討論各族群之間的衝突佮矛盾,希望佇尊重各族群文化自主發展的前題下, 會凍閣和諧相處。
5月中,台語社邀請原聲帶社、客家社共同推拺校園本土化的活動,發表一份聲明,要求教育部廢除共同必修課,全面落實本土化課程,共台灣史佮台語(包括福佬話、客話佮原住民語言)囥[khng,放]佇通識教育當中,並且佇每一個學術研究的範圍內鼓勵台灣研究、建立台灣研究佇學術上獨立的主體地位。聲明的聯署團體包括台大台語社、客家社、原聲帶社、大論社、勞工社;交大台研社、客家社;淡江台語社;實踐台研社;逢甲客家學社。5/25,佇台大校門口舉辦座談會, 邀請黃武雄、江文瑜、吳密察、蔡丁貴四位教授,討論通識教育本土化的必要性,希望第一任開放選舉的非官派校長會凍排除教育部的壓力,代先佇台大推行課程改革的空課。
5/30第六期《台灣語文》出刊。
7/16到19號佇金山舉辦第一屆全國高中生台語生活營,希望將台文的籽掖[ia7,灑] 向高中的環境。
8月份參與學生台灣語文促進會進行的台語文工作者採訪計劃。
(7) 1993.9 ～ 1993.12
社長化工系吳亦清, 繼續頂學期的小組活動。
11月份邀請台語運動歌曲創作者官不為先生演唱台灣歌劇。
9～11月中間參與學生台灣語文促進會「縣市長候選人母語態度調查計劃」。
(8) 1994.1 ～1994.7
社長法律系林臻嫻。除了常態性的小組佮讀冊會以外,這學期參加410教育改革聯盟的籌備,佇教育基本法當中,要求咱愛有受母語教育的權利,並且參與410的攤位排擔佮遊行。
7月繼續舉辦第二屆高中生台語生活營。
(9) 1994.9 ～ 1994.12
社長經濟系許文泰。這學期主要是社內讀冊小組的進行,累積社員個人的能力。
(10) 1995.1 ～1995.6
社長公衛系謝欣如。這學期新開一個台文寫作會,參與的社員逐[tak8,每]擺攏愛交一寡台文作品,社內台文寫作的風氣變甲誠[chiaN5,非常]旺,5/20參加學生台灣語文促進會佮淡江合辦的台文創作比賽,得著真儕獎。
這學期佮趙天福老師嘛做伙參與演詩的表演,2/24佇誠品「詩的星期五」活動中表演,3/15佇台大文學院門口表演,學生普遍的反應真好,對台語詩的接觸開始有興趣。
最近一、兩冬內,真儕電台成立,媒體的力量漸漸受著重視,感覺透過電台會凍影響閣卡儕人做伙來參與台語的工作,所以自3/19開始,佇「台灣之聲」製作一個「台語俱樂部」的節目(每禮拜的下晡),透過對台語歌的紹介來推廣台語。
5月初蘭陽戲劇團經費予宜蘭縣議會刪除,因為大家對以母語做表現的傳統歌仔戲有一份疼心,開始走傱[chau2-chong5,奔走]參與「搶救蘭陽」的活動。5/5邀請蘭陽戲劇團團長林茂賢來台大辦說明會。
6月份開始籌備「艋舺有線」電視台的台語節目。
7/11-14舉辦第三屆高中生台語生活營。
1.1.4 淡江台灣語言文化研究社
淡江大學台語文社, 經過傅中其、蔣為文、李坤城的走傱、籌備,佇91年9月正式成立。
(0) 1991.2 ～ 1991.9
這學期是籌備階段。抵[tu2,剛]開始辦台文社,只是真單純對台語有興趣,嘛毋管有人無人、有班底無班底,想講khan-pang2 [招牌],先giah8[舉]出來才講。彼時陣傍[png7,憑藉]學運潮流的福氣,向學校申請立社並無抵著正面阻擋,只是,學校攏以間接的方式,親像預算補助等來限制,後來以「台灣語言文化研究社」通過。
籌備的時陣得著真儕熱心的支持,嘛有辦一個兩工的研習營,量其約仔[大約] 有20捅[thong2,多]人參加。
(1) 1991.9 ～ 1992.1
機械系蔣為文擔任第一任的社長,客話部分主要是傅中其塊負責。頭一學期有開福佬話班佮客語班,福佬話班的老師是阮德中先生,教音標;客語班是涂春景先生,教一寡仔對話。另外益閣[iah-koh,還]有幾場講演佮討論會, 包括泰雅族的變遷、客話佮客家文化、台灣歌謠等等幾方面。嘛有辦讀冊小組,但是辦無起來。
除了卡正式的活動以外,平常時仔嘛鼓勵、要求社員用母語來思考,留言簿用台語來寫,並且積極參加校內各種營隊活動,踮尹所謂的正式場合頂面用台語來發言,開拓台語的生存空間。
寒假時陣舉辦第一屆台灣語言文化研習營(92'0113-16),予[hou7,給]普通時仔無閒參與社團活動的人會凍有機會來熟似[sek8-sai7] 台語文化,大約有三、四十人參加。
(2) 1992.2 ～ 1992.7
這學期,一方面因為頂學期活動傷[siuN,太]捷[chiap8,頻繁],另外一方面因為抵辦社團,無經驗,加上營隊期間工作人員之間有摩擦,所以幹部動員情形無理想,福佬話班佮客話班停開,改做社團內會曉的人家己來抴[chhoa7,帶], 而且繼續辦幾場仔講演佮討論會。
5/23舉辦台灣語文系列比賽,有講演(福佬話佮客話)、台語文徵文比賽、歌謠等等的比賽,主要目的是希望透過活動來鼓勵社員對母語、台文的學習,並藉活動引起外界的注目, 卡重要的是透過活動來連繫[he]社團佮外校台文社的感情。台大、師大、清華、交大等等友社的社員嘛有參加。
(3) 1992.9 ～ 1993.2
第二任的社長是歷史系林獻廷。因為有頂一年活動的經驗,發覺一直對外辦活動嘛毋是辦法,應該設法將社團的班底建立, 有一致的理念才有法度維持社團、對外辦活動,所以以後社團重心慢慢轉對[向]讀冊會,這學期找楊碧川來講台灣史。
除了對內的讀冊會,對外的相關社團交陪嘛積極經營。校園內行卡倚[oa2,近] 的有環保社、論壇、紅樹林、客家社等,校外主要是以學生台灣語文促進會等各大學台文社為主。
(4) 1993.2 ～ 1993.9
第三任社長是保險系謝瑞華。這學期讀冊會繼續由楊碧川抴[chhoa,帶]台灣史;並且向學校要求開放母語放送。
淡江一工有兩擺放送社團活動的時間,台語社要求各族群有權利選擇家己的母語來放送,毋過學校一直以技術問題、學生會聽無、學校是公共場所等問題來拒絕。
另外嘛要求學校增設台灣研究的課程。5月中繼續辦「第二屆台文比賽」。
另外,學校每學年攏會辦「社團評鑑」,台語社聯合一寡友社做伙起來反抗, 要求會凍取消。
(5) 1993.9 ～ 1994.2
第四任仝款是謝瑞華擔任。
讀冊會改由家己來分配導讀。並且參與學生台灣語文促進會辦的縣市長候選人母語教育態度調查。寒假協辦南鯤鯓台語文學營。
(6) 1994.2 ～ 1994.9
第五任社長是物理系鄭吉棠。
5月中繼續辦第三屆台灣語文系列比賽。
社團班底漸漸穩固,開始籌備出社刊佮辦台灣週。8月協辦台中台語文學營。
(7) 1994.9 ～ 1995.2
第六任社長是土木系鄭明志。出社刊《台灣囡仔[gin-a,孩子]》創刊號。
參與凱達格蘭的田野調查。
11月底辦台灣週,有冊展、講演、海報展、影片欣賞等,並將四族仝心旗插佇會場。因為抵好是選「省長」前一禮拜,閣有一寡新黨支持者來鬧場。
(8) 1995.2 ～ 1995.9
第七任社長是化工系簡明捷。
除了讀冊會以外,並且參與地方工作室的田野調查、交流,並唅[ham5,和] 客家社辦以客語為主體的第四屆台灣語文系列比賽。
另外,對蘭陽戲劇團預算被刪除,嘛提出聲明抗議。
1.1.5 實踐台灣文學欣賞研究社
實踐台研社,全名是「台灣文學欣賞研究社」,是結合一陣關心台灣、熱愛鄉土的學生所組成,佇91年6月成立,經過一番的拍拚佮思考,才會凍來成立,其中有空間設計系的陳坤濱老師來鬥相共。
(1) 1991.9 ～ 1992.1
這學期,參本校畢聯會辦「台灣文史冊展」,另外亦有辦過兩場演講,分別是由林雙不先生參林文義先生講台灣文學;尚介重要的是「台灣文學讀冊會」的成立,阮讀「台灣作家全集」,ui3[從]日據時代作品讀,由文彬先領讀, 益閣有由前衛出版社所贊助,佇士林東坡居,參作家東方白先生座談,討論【浪淘沙】的創作佮台灣文學。
(2) 1992.2 ～ 1992.6
這學期,阮佇讀冊會方面加強;台灣文學讀冊會,除了接續台灣作家全集外,並聘請張恆豪先生來指導,益閣增加三個讀冊會,請楊碧川老師講「台灣史」,李慎之指導「電影讀冊會」,「台文讀冊會」亦佇這陣成立,由方博弘來指導大家學習台語文,另外亦有請黃秋芳小姐來講「台灣文學中的女性角色及地位」,阮亦參女研社共同佇學校參加反核的運動。
另外一項成果佮理想的表現是社刊「憨集」的出刊,已經出三期,是社員的作品發表。
1.1.6 清華台語文社
台大台語社的前身是清華台研社母語組,佇92年8月正式成立。
(-3) 1990.9 ～ 1991.1
清華台研社成立母語組, 語言所的科元擔任組頭,並無正式的活動,佮歌謠組做陣唱歌。
(-2) 1991.2 ～ 1991.6
開「本土語言講座」, 由科元主講,首先ui[從]台灣語言的歷史發展到chit-ma台灣語言的現狀做了解,然後進入福佬話的標音系統,將福佬話的聲韻做真清楚的解說。佇台研社的社誌開始用福佬話來書寫。
(-1) 1991.9 ～ 1992.1
數學系的明哲接組頭。客話班請新竹師院的范文芳教授來教(海陸腔)。科元抴[chhoa7,帶]一個「台語文欣賞時間」,讀一寡用福佬話創作的文章,白話三字經,佮聽錄音帶。開始使用「非官話」留言簿,用台語來書寫。11月, 福佬話讀寫班開始上課,由資訊所的允言來負責,教羅馬拼音、讀台語文章,交大台研社的社員嘛做陣上課。交大佮清華開始使用Email ,成立福佬話佮客話的Groups,佇網路頂峘[teng2-koan5,上面]用台語來通批。
(0) 1992.2 ～ 1992.8
歇寒時陣佮交大台研社合出「台語風」第一期,將頂學期的成果留一個記錄,內容包括Email 、海報牆頂面用台語書寫的物件、非官話內底卡精彩的部分,以及社員其它的台語作品。
交大、清華逐年舉辦的梅竹賽,本來欲增加「台語辯論比賽」,但是因為籌備委員佮咱對「台語」的認捌[jim7-bat,認識]無仝,尾仔退出梅竹賽家己來辦,並邀請台大客家社、師大客家社、台大台語文社鬥陣來車拚,比賽由清華物理所的阿邦(福佬話)、台大的秀婷(客話)做主持人,邀請鍾肇政、羅肇錦、張光宇(客話部分)佮吳秀麗、許曹德、黃冠人(福佬話部分)做評審; 比賽結果無輸嬴。
台語讀寫班繼續進行,科元佮允言輪流來抴[chhoa7,帶領] 。3月底,允言佇國際網路頂峘做廣告,招人加入Email 的Group ,一寡海外的留學生加入。
5月底淡江大學辦台語文系列比賽,科元佮允言擔任徵文比賽福佬話部分的評審。
(1) 1992.6 ～ 1993.6
6月準備欲獨立建社, 總算佇8月正式成立,社長是數學系的明哲。8月做伙去參加自立報系所辦的「鹹份地帶文藝營」, 嘛有參加尹所辦的徵文比賽,結果明哲得著新詩組第一名,允言得著散文組第三名。
10月開始正式招生,但是社員人數無儕。每禮拜三暗時上課,科元、明哲輪流抴[chhoa7],交大台研社的朋友嘛做伙來上課。
編兩期的刊物《生活台語文通訊》。
93年有辦陳明章台灣歌演唱會,嘛有邀請阿仁、阿惠來唱歌。
(2) 1993.10 ～ 1994
第二任社長是動機系謝家宏。允言、明哲攏畢業,科元趕論文,出現斷層的情形。
1.1.7 學生台灣語文促進會簡介
92年2月中,交大台研社辦一個「冬令台灣文化營」,因為抵仔好[剛好]真儕[多]學校台語相關社團的朋友攏[都]有來參加,佇營隊結束前一工的暗時,大家做伙來開會,討論聯合來成立一個團體的可能性,除了一寡路線、運動觀的討論,會中決定,正式的名稱叫做「學生台灣語文促進會」。
後來,中心著踮[tiam3,在]台北,3月中閣佇[在]台灣研究基金會的所在開一擺[次] 會,選出籌備委員,有中興法商方博弘、台大台語文社林玉梅、台大客家社羅盛峰、實踐台研社陳文彬、淡江台語文社蔣為文、政大台文社蔡郁芝。
經過籌備委員的開會、走傱[chong5,奔走]、聯絡,「學生台灣語文促進會」佇5/3禮拜十點踮台大校友會館舉辦成立大會,通過章程,選出第一任會長:清華資訊所的楊允言,佮五名執行委員: 台大台語文社吳亦清、台大客家社羅盛峰、實踐台研社顧恆湛[heng5-tam]、師大客家社劉慧真、成大台語文社賴進龍。
(1) 1992.5 ～ 1992.8
開始的時,擬定的短期工作計畫包括:
寫一張公開的批予台教會,希望尹重視語言台灣的語言問題,上課的時陣儘量用台語來講課,尚無嘛愛濫台語,予[讓]學生有閣卡儕的機會來接觸台語;另外,想欲[要] 邀請台教會的老師辦一個座談,面對面來溝通。
要求各大專院校開設有關母語的通識課程。
鼓吹益未[尚未]成立台語社的學校成立台語社,希望每一間學校有一個點,尤其是尚介保守的師範大學、學院。
但是,做這寡代誌愛了真儕精神,閣因為已經倚[oa2,靠近] 期尾,除了予台教會的批由賴進龍寫好以外,實際上並無做啥麼代誌。
而且這的會佇實際運作的時確實有一寡困難存在,因為成員攏是各校台語相關社團的社員,平常時應付家己社團本身的活動著已經佔去真儕時間a,閣因為分散佇台灣各地, 若欲[beh,要]聚會著愛等歇熱益是歇寒的時陣。
4月佮5月,有真儕會員參加環保聯盟主辦的反核遊行佮台教會所主辦的「反獨裁、廢國大」遊行,大家趁這的機會討論促進會的方向,決定欲出刊物來推拺台語文運動, 歇熱的時陣先編四期看眛[mai7] 。
7/2佇交大聚會,確定歇熱四期的主編(這擺聚會所討論的代誌,請參考《台語學生》試刊第一號)。8/8到8/10,一寡會員去烏來參加「台灣青年歇熱研習營」,初八暗時開會, 決定開學了後欲正式對外發行,一個月出三期,由各校輪流來編,先做半冬看眛。
一個月出三期對大家的負擔真重,但是按爾做,才卡會凍達到運動的目的。
(2) 1992.9 ～ 1993.9
9/10,學生台灣語文促進會的機關刊物《台語學生》正式創刊,由台大台語社、成大台語社、清華台語社、交大台研社、台大客家社、實踐台文社、淡江台語社輪流來編,一個月出三期,對社會徵求訂戶,經過半冬左右的拍拚, 訂戶大概有三百外人,包括日本、美國、加拿大的訂戶。
編刊物真忝[thiam2,累], 大家將氣力攏用佇chia[這裡], 相對著無做其它的空課; 但是因為有寫文章的壓力, 所以有一寡好的台語作品出現。另外, 因為刊物是看會著的物件,透過編好的刊物來廣告, 陸陸續續有捐款入來, 辛辛苦苦將1-18期經營落來了後,無算人工、拍字費、稿費, 攏總偆[chhun,剩]六萬外箍[khou,元]落來, 予後來有經費通好做一寡空課。
93年5月,佮淡江台語社、客家社合辦台語文系列比賽。
7月開始,利用歇熱的時間, 開始台文工作者採訪計劃, 攏總採訪14個工作者。整理好的資料, 佇95年2月出版。(【台語這條路──台文工作者訪談錄】,台笠出版社)
(3) 1993.10 ～ 1995.2
9月, 促進會佇交大開會, 會中選出第二任的會長,交大資工所博士班的滷卵。
第二任會長任內, 《台語學生》改做季刊, 攏總出四期(19-22期), 編刊物的負擔變細。
10月至12月, 由運動部雪香主持,做縣市長候選人母語教育態度調查, 後來資料整理出來, 佇立法院辦公聽會。
另外,會員利用93年、94年歇熱的時間,參與鄭良偉教授主持的國科會計劃, 做台語書面語佮詞庫的整理。
94年5月,佮淡江台語社、客家社合辦台語文系列比賽。
94年7月辦Tayal生活營,引抴學員關心原住民、了解原住民,落實性命共同體的理念。
另外閣協辦兩個台語文學營,分別是94年2/16-20南鯤鯓台語文學營佮94年 8/3-6台中台語文學營。一方面去營隊鬥腳手,另外一方面大家相招來聚會、熟似台語文運動的朋友。
(4) 1995.2 ～ 1995.5
94年5月,會長改選, 第三任會長由台大經濟系的許文泰擔任, 但是因為一寡因素,到95年2月才完成交接。
交接了後,佇2/28召開一擺臨時大會,淡江、實踐、台大卡少年的朋友攏有來參加,頂兩任的會長以及以前的一寡朋友嘛有來,算一擺有「世代交替」意義的聚會。
95年5月,繼續佮淡江合辦台語文系列比賽;同時改選會長,第四任會長由台大中文系吳國禎擔任。
(5) 1995.5 ～
改選會長,同時選出三名執委,分別是淡江的志偉、實踐的美君、高中生的耀鴻。
因為促進會的經濟一直攏有有淡薄仔問題(每一任的會長攏加減倒貼一寡錢), 欲繼續維持一份運動性的刊物有卡困難,所以佮台文工作者陳明仁、陳豐惠、廖麗雪合辦《台灣文學雜誌》,每一期內底有四版以上是促進會的會訊,包括台語學生的動態報導佮學生的台文作品……等等。
1.1.8 高中生台灣語文促進會
台語文運動佇高中發展的情形,那親像一個抵[tu2,剛]出世的幼嬰仔,人少,活動力嘛無大。這部分紹介高中生台語文運動的部分,這佮台大台語社辦生台語營隊有真大的牽連(請參考2.4.3)。
目前所知,最近兩年內有四個相關的社團成立,分別是93年台北市大同高中台語文社、楊梅高中台語文社,以及台北景美女中的本土研究社;94年台北市北一女補校成立台研社。逐個[tak8-e5,每個]社團攏有無仝的特色。
大同高中台語文社,創始人是董耀鴻,當時對外宣佈是第一個高中台語文社, 社團無特定的方向,請陳明仁、陳豐惠來教社員歌謠、台文,辦大型活動,辦細型的讀冊會,但是成果無好。
楊梅高中台語文社,由吳國禎、莊家彥創辦,兩人對相關物件有真深的研究, 閣得著陳明仁、陳豐惠(福佬話部分)、黃恆秋(客話部分)三位的指導,社團的內容真豐富,值得注意的是,伊是四間學校內底唯一包括客話的社團。
景美女中本土研究社,伊的前身是三民主義研究社,尾仔開始注意台灣本土的物件,創始人本來想欲改做「台灣」研究社按呢的名,毋過「台灣」這兩字學校看著會驚,所以壓力足大,只好改用「本土」研究社。尹上過台語文的讀寫,社員反應袂bai2[不錯],閣有出一份刊物,可惜刊物並毋是用台文來創作。
北一女補校台研社,本來是一陣仝班的同學組成的讀冊會,讀一寡有關台灣本土的冊,後來感覺讀冊會的組織欲發展、傳承攏有真大的困難,所以找台大台語文社協助,向學校申請,94年正式成立,有專門教台語文的課程。
94年歇熱台大辦高中生台語生活營,有學員建議佇高中成立一個橫向的組織統合高中生這方面的力量,後來由董耀鴻主導,聯合北一女補校台研社、景美本土研究社、中山…… 等其它學校學生開始籌備,95年4月正式成立,開始運作,4/6本來欲辦「春遊蘭陽地」活動,因為宣傳失敗、聯絡無好勢煞來取消活動;5月份出一份刊物:《高中生寫台文》,總共一頁,四篇文章,6月決定併入學生台灣語文促進會。
1.1.9 其它
這部分因為資料無夠, kan-na[只]會凍簡單紹介。
除了頂面所講著的部分以外,根據目前所知影的,92年中興大學法學社有開台語讀寫班,由當時佇清華大學客座的鄭良偉來上課。
另外,文化大學台灣文化社佇92年、輔仁的團契佇93年、海洋大學鄉土文化社佇93年、台大城鄉所佇94年、政治大學台灣文化社佇94年,嘛攏有開台語班,講師攏是陳明仁、陳豐惠,上課內容主要是台灣歌謠、台語讀寫。
1.2 各社團變遷
成大台語社是尚早成立的, 林繼雄老師閣是台語文運動的重要人物,一開始林繼雄的現代文書法有佇社內推行,但是92年以後, 社團著放棄這種書寫法,通用的是漢羅、白話字,嘛有全羅的物件。成大台語社的政治色彩一直攏真強。
台大台語社是所有這寡相關社團內底社員人數尚介儕的,一開始是卡有運動性的社團,嘛予儂劃佇台大校園內的「改革派」,毋過最近一冬,社團發展變做一個卡無政治意識, 卡倚[oa2]「學術性」的社團。另外,創社元老佇社團內推拺許曹德的台語文字[註]總是後來拺袂行, 目前主要是採用漢羅、白話字。
淡江台語文社,成立之初,聲勢袂bai2[boe7/be7-bai2,不壞],但是因為欠缺班底, 所以後來一段時間活動力減少,後來透過班底的培養、參與校外的田野工作,以及對學校的抗爭…… 等等的刺激,漸漸閣恢復活力。
學生台灣語文促進會性質卡無仝款,伊是各校聯合起來的組織,一開始的串連空課,包括客家社的朋友,總是後來客家朋友參與的熱情愈來愈降低,而且嘛另外組客家學生聯盟,到 93年以後,會使講已經無客家社的朋友來參與促進會的運作。另外,活動範圍主要以北部為主,一開始雖然有成大台語社加入,總是聯絡、聚會攏卡費氣,94年以後成大卡失去聯絡,但是,只要社員會凍互相熟似,欲繼續保持聯絡並無困難。成立之初,衝力卡有夠,可能一方面是抵[tu2,剛]成立大家攏有卡大的寄望,一方面是大家互相卡有熟似,卡好招做伙做代誌,後來漸漸感覺互相的聯絡卡無,小可[sio2-khoa2, 稍微]散散的感覺,希望這種情形真緊會凍解決,按呢才有法度做一寡大代誌。
譜譜仔講起來,每一個社團攏有傳承的危機,但是這是一般學生社團攏會抵著的問題。
[註]許曹德所發展的書寫系統,外形親像韓國的文字,讀變調的時,聲調囥倒爿, 聲母韻母佇正爿;讀本調的時顛倒peng2[翻過來],聲調佇正爿,聲母韻母佇倒爿。
沒有留言:
張貼留言